Morrió Emma Morano, la postrera persona ñacida nel sieglu XIX

Va tiempu que taba nidio que diba pasar a nin tardar. El llistáu de persones vives ñacíes nel sieglu XIX yera cada vegada más curtiu y esti sábadu 16 d’abril, a los 117 años y 137 díes d’edá, la supercentenaria piamontina Emma Morano morría na so casa en Verbania, xunto al llagu Maggiore, dexando al mundu ensin nengún humanu vivu ñacíu nel sieglu XIX.

La que yera dende’l 12 de mayu de 2016 la persona más vieya de la tierra, vivió en trés sieglos estremaos y tenía nel so poder dellos records venceyaos a la so edá. Yera  la persona más vieya de la hestoria del estáu italianu y la segunda d’Europa, la más vieya d’ente les persones que vivieron en trés sieglos estremaos, asina como la quinta persona más vieya de la hestoria, d’ente les que tán reconocíes pola documentación y les pruebes correspondientes del Gerontology Research Group, entidá encargada de buscar y verificar les edaes de los supercentenarios.

Morano recibió la reconocencia del estáu italianu al traviés de la Orde al Méritu que-y otorgó’l presidente de la República d’Italia nel añu 2011.

Esta supercentenaria vivió dos guerres mundiales y vio’l pasu de 11 papes y 90 presidentes d’Italia, asina como cambeos ablucantes na forma de vida y avances tecnolóxicos y sociales inimaxinables cuando algamó la mayoría d’edá en 1917, añu de la Revolución rusa.

Emma Martina Luigia Morano que ñació’l 29 de payares de 1899 tuvo antecendetes familiares de llonxevidá y llevaba una dieta basada nos güevos cocíos y crudos. Con ella muerre tamién un símbolu del feminismu. Foi, yá enantes de la Segunda Guerra Mundial, la primer muyer italiana en divorciase, tres carecer un home maltratador.

Agora garra’l téstigu como persona más vieya del mundu una xamaicana, Violeta Brown, que ñació’l 10 de marzu de 1900 y superó yá los 117 años.