Iniciativa pol Asturianu destaca la importancia del idioma pa da-y utilidá social a la RTPA na presentación del informe sobre’l Mandatu marcu pa la viniente década

Iniciativa pol Asturianu presentó esti xueves nuna rueda de prensa “Una RTPA pa la próxima década. Informe d’Iniciativa pol Asturianu con un analís de los diez años caberos y propuestes llingüístiques y culturales pal Mandatu Marcu”. Un documentu col que busquen, en pallabres d’Inaciu Galán, presidente de la organización “apurrir propuestes pa da-y utilidá social a la RTPA nos vinientes diez años, convirtiéndola nuna ferramienta eficaz na tresmisión del asturianu y na vertebración d’Asturies”.

L’informe preséntase nesti momentu nel que se ta volviendo a poner en marcha la redacción del Mandatu marcu de la RTPA dientro de los trabayos de la Xunta Xeneral ya inclúi propuestes d’acción pa facer una parrilla televisiva que tenga una presencia tresversal del asturianu. Galán recordó que “foi l’asturianismu quien siempres tuvo ente los sos oxetivos cuntar con una radiotelevisión pública asturiana” y qu’agora les propuestes “faense col envís de da-y viabilidá a esti proyectu, que de siguir na llinia actual pue tener un difícil sostenimientu nel futuru”.

Fonsu Martín, vocal d’Enseñu d’Iniciativa pol Asturianu, tamién faló na rueda de prensa, y esplicó como “la presencia del asturianu na radiotelevisión pública, n’especial nos programes infantiles y xuveniles pue convertise nuna ferramienta bien potente que complemente al llabor nes escueles y ayude a recuperar o reforciar la tresmisión interxeneracional del idioma, en definitiva, a da-y futuru”.

Galán esplicó na rueda de prensa que l’Informe va entregase a los miembros del Conseyu d’Alministración y a la dirección de la RTPA, asina como a los grupos políticos presentes na Xunta Xeneral, que son quien han consensuar agora un documentu marcu colos oxetivos pa los vinientes diez años de RTPA.

El primer mandatu marcu de la sociedá Radiotelevisión del Principáu d’Asturies SAU ha valir pa correxir los problemes detectaos nel analís de los diez caberos años. Lo primeru que tien que facer el futuru documentu ye reconocer como una de les misiones del serviciu públicu audiovisual n’Asturies la de normalizar socialmente l’asturianu. La única manera de normalizalu ye ufiertar conteníos de calidá en tolos xéneros y formatos, con corrección llingüística, adecuadamente promocionaos y n’horarios afayadizos pa esos finxos.

Poro, la redacción que se propón ye la que vien darréu:

RTPA, como serviciu públicu que ye, ha contribuir al procesu de normalización social del asturianu y gallego-asturianu, garantizando l’accesu de la ciudadanía a conteníos na llingua propia en tolos xéneros y formatos, qu’han ser adecuadamente promocionaos y emitíos n’horarios afayadizos pa esti fin; afalando, de pasu, una industria audiovisual propia que garantice la producción d’estos conteníos y asumiendo un rol compensatoriu respectu a otres cadenes públiques o privaes. RTPA tien que ser exemplar nel so compromisu colos elementos fundamentales y actuales de la cultura asturiana, renunciando a siguir les dinámiques propies de los otros medios de comunicación con presencia n’Asturies.

Esta ye la única forma qu’entendemos dende Iniciativa pol Asturianu pa consiguir una radiotelevisión al altor de les circunstancies sociollingüístiques d’Asturies. Una RTPA que seya útil pa recuperar l’autoestima de los asturianos y les asturianes al rodiu de la so llingua y cultura propies. Tenemos la oportunidá de camudar la situación de la RTPA al traviés d’esti nuevu Mandatu marcu, que va afitar la forma de trabayar la próxima década. Nun podemos dexar pasar esta oportunidá hestórica pal asturianu, p’Asturies y pal propiu Ente.