EL PRESENTE YE DE NUESO: ROJAVA

Por Pablo M. Testa

Nestos tiempos que pasen tan rápido, escribir paez xera d’alloriaos, puesto que cuando se ta entamando a escribir sobre un aspeutu, resulta que poco tiempu dempués la tema caducó; el contestu cambió y les nueves posibilidaes se tornen infinites.

Nun ye casualidá que los acontecimientos qu’asoceden na nuestra hestoria presente, la que construyimos día a día, cola nuestra actividá o cola nuestra pasividá, tean entellazaos, tean venceyaos íntimamente. El Conflictu nel este d’Europa; la Guerra de Siria; los Refuxaos; los Movimientos Militares qu’entamarán nestos meses nel sur d’Europa, tando la nuestra Península destinada a agospiar más de 30.000 militares (más parafernalia variada) de la OTAN; los Procesos Elleutorales griegos; l’ansia d’Independencia del Pueblu Catalán; los discursos d’apertura de Procesos Constituyentes nel nuestru Estáu o a lo menos revisión del Réxime del 78; los Procesos de Tresformación Social d’América Llatina; l’Auxe tamién de los Facismos; etc., suponen un seísmu perimportante nel bucle rutinariu y amargoxu nel que mos alcontrábemos va unos años, concretamente poco enantes del 15M del 2011 y les famoses primaveres árabes.

Sicasí, esti pequeñu artículu quiero centralu nuna esperiencia que se ta dando nel Kurdistán siriu, na fastera autónoma de Rojava, nel so autogobiernu, na so esperiencia revolucionaria escontra tou pronósticu, amosando una valentía frutu de la ilusión qu’espierten los sos suaños de llibertá. Llibertá doble: la llibertá del so pueblu que lleva lluchando dende’l sieglu XIX por algamar la so independencia y xunión (yá que’l Kurdistán ta xebráu ente Irak, Siria y Turquía); y anguaño, la Llibertá coleutiva como Comunidá, una llibertá integral.

El so procesu revolucionariu centráu en tres cantones, el más importante’l de Kobane, ta afeutando en xeneral a tol pueblu kurdu, alló u ésti tea; y ta refugando los ataques del Estáu Facista del nomáu ISIS.

Los nuestros compañeros kurdos, tan lluchando, en primer llugar, escontra esti estáu satélite d’Israel y EEXX. Hai de dicir equí que les declaraciones de refuxaos y combatientes despliquen que les armes usaes pol ISIS son americanes ya israelíes, y qu’amás, va poco llegaren 700 camiones con abituayamientu al territoriu islámicu. Esto namás ye posible, evidentemente, cola connivencia de los estaos miembros o satélites de la OTAN.

Pero non solo lluchen escontra esti estáu xenocida, sinón que tamién tienen de tar pendientes de les llendes con Turquía, puesto que pal Estáu turcu esti movimientu kurdu nun xenera más qu’inestabilidá nel so territoriu. Por contaxu podría dase un movimientu asemeyáu nel Kurdistán turcu. Hai de remembrar que Kobane llenda con Turquía, que namás abre les sos fronteres de forma tímida pa la entrada de víveres, percontrolada y reducida. Y amás d’ello, tamién tienen de tar sollertes a los pasos que diere, nun futuru cercanu, el gobiernu siriu. Y ello ye, polo que supondría la independencia de los territorios kurdos: la perda de Turquía, Siria ya Irak de la mayor parte de los sos xacimientos de gas natural y petróleu. Y nesti sen hai de dicir que Rojava tien, como nun podría ser d’otra manera los xacimientos cooperativizaos.

La fastera entamó ser lliberada pol pueblu kurdu, lo qu’anguaño compón Rojava, a partir de la fuxida dafechu del gobiernu y autoridaes siries. Les xunidaes kurdes (masculines y femenines) tomaron el territoriu lliberándolu, en primer llugar, de Siria, y en segundu llugar del ISIS qu’avanzaba cuasique ensin dengún tipu torga.

Pero esti movimientu revolucionariu, surdíu ideolóxicamente, de les reflexones qu’en prisión toviere’l so llíder Abdullah Öcalan, qu’atienden a una desxerarquización de les relaciones, la desestatalización de la vida, la organización confederalista onde les comunidaes caltienen el so poder de decisión demientres se coordinen ente elles pa cuestiones que-yos incumben a toes, agora paez ser una realidá nesta fastera. Nella vemos una autoxestión de la economía, les infraestructures, la sanidá, la educación, etc., controlaes ente los movimientos cooperativistes que xestionen les actividaes xenerales, y les propies comunidaes que regulen la vida. D’esti mou solliño les pallabres que l’anarquista y académicu David Graeber pronunciare sobre una de les coses que más-y llamó l’atención por cuasi paecer sorrealista nel nuestru mundiu: «Uno de los primeros lugares que visitamos fue una academia de policía [Asayiş]. Todos tienen que realizar cursos sobre resolución no violenta de conflictos y teoría feminista antes de que se les permita tocar un arma. Los codirectores nos explicaron que su objetivo final es dar a todos los habitantes del país seis semanas de entrenamiento policial, con lo que podrían eliminar a la policía en última instancia» (Estrayíu de la entrevista fecha pol periódicu Diagonal, espublizada nel mediu con fecha 13/01/2015).

Nun podríemos dexar d’espeyar un aspeutu que pue chocar, fundamentalmente, pol asitiamienu d’esti procesu revolucionariu, Oriente Medio (dende la nuestra perspeutiva xeopolítica). Ello ye la presencia, llucha, y llevantamientu de la muyer como soxetu revolucionariu de primer orde. De fechu, munches de les riegles establecíes nes Asamblees, aluden al empoderamientu y emancipación de la muyer, cuestión venceyada tamién a la práutica policial enantes comentada.

En Rojava podemos dicir que’l patriarcáu (nesti casu musulmán) ta morriendo d’inanición. Les muyeres organicen les sos propies files armaes baxo les YPJ, que lluchen xunto a les YPG, que digamos son les milicies básiques del pueblu kurdu.

Poro, y agora mesmo, debiéremos contemplar la posibilidá, dende los movimientos de tresformación social del nuestru país, Asturies, pero tamién del resto del Estáu, de xenerar comités de sofitu a la so causa, por nun facer lo que fixeron nes nuestres revoluciones otros pueblos, esto ye NADA, a esceición de los comités y brigaes populares ya informales que, nel casu la Guerra Civil, sí amosaron y exercieron el so sofitu a la causa antifacista y revolucionaria al empar.

Con esti testu, resume de lo qu’asocede anguaño nel nuestru mundiu, y sobremanera poniendo los güeyos nesti procesu utópicu y gloriosu al mesmu tiempu, quinxere esponer la necesidá d’establecer n’Asturies un Comité de Solidariedá con Rojava.