Antonio Virgili, director de RTPA, aconceyó con miembros de la formación ultraderechista VOX

0
1785

Un videu filtráu nes redes pol periodista Javier Neira, muestra a Antonio Virgili, director de la radiotelevisión pública asturiana (RTPA) xintando y aldericando con miembros de la formación ultraderechista VOX. Nel videu, grabáu va siete meses nun restorán, pue vese a Virgili dando esplicaciones sobre la xestión de la TPA sentáu ente Ignacio Blanco, cabeza de llista de VOX nes elecciones autonómiques asturianes, y Javier Jové Sandoval, miembru de la executiva del mesmu partíu ultraderechista. Dambos dos formen parte del Club de los Viernes, conocíu poles sos idees ultralliberales.

Esti alcuentru, nel que Virgili cita encuestes encargaes pola cadena de les que nun se tien conocimientu públicu, fala de la presencia del asturianu nel ente públicu, ensin dar datos concretos.

Esta escandalosa connivencia de Virgili con miembros de la estrema derecha nun ta sentando nada bien n’amplios sectores sociales ya institucionales. Miembros destacaos de dellos partíos presentes nel parllamentu asturianu comenten yá en privao’l so descontentu col comportamientu de Virigili, y nun ven razonable que se xunte a falar de la RTPA “con destacaos miembros de la marxinal ultraderecha asturiana”. Y ye que’l so nomamientu depende del parllamentu asturianu. Dalgún representante políticu fala yá de la posibilidá de que Virgili pudiera ser llamáu a comparecer ante’l parllamentu por estes peligroses amistaes.

Va tiempu qu’Antonio Virgili consiguió enemistase con amplios sectores. La so nula apuesta pol asturianu, pese a los bonos datos d’audiencia de los programes emitíos nesta llingua, y la so negativa a facer siquier un informativu diariu n’asturianu, llevó a l’Academia de la Llingua Asturiana, a pidir la so dimisión va dellos meses.

Esti nuevu escándalu vuelve poner en dulda’l so papel al frente de la radiotelevisión pública asturiana, a la que llegó tres dellos años en funciones, por alcuerdu parllamentariu ente’l PSOE de Javier Fernández, el PP de Cherines ya Izquierda Xunida.